سفر الغُفران

من كل ناحيه إتلم حواليا الكلام
جاني القمر سألان
عن كام قصيده
ومافتكرش كتبتهم
قام القمر من عرشه من قلب السما
مادد ايديه
قال القمر
إزاي
وليه؟
ماحاورتهوش
قام القمر
مافهمتهوش
كل العشاقى الولهانين قالوا القمر
يشبهني من كل اتجاه
كل القلوب اللي تقع في الفخ قالت آه وآه
زي القمر
قرب الكمال
يفرق عن الرب الاله
في الإحتمال
ولا احتمال ان المسيح يبقى هنا
قالوا انا
أبقى المسيح
يمكن عشان شافوا المسيح فيا انا
جسمي إنصلب؟
لكن زمان قالوا بإنه ما انغلب
وأنا انغلبت
وحدي كتبت القصه ومسحت الكلام
وحدي أنا
دقت الآلام
ولبست فوق راسي تيجان
شوك الندم
ويّا البدايه يتوّجوني ع العروش
ومع الخلاص
قالوا خلاص
كان الشيطان..مافهمناهوش
تتصوّروا؟؟
أبقى انا
أبو العيون أم الفرح
والقلب جنّات العدن
مهزوم حزين
متروك
ومين؟
ينده على المرجوم يقول
إنه الأمين
أو حتى كان فلّاح بينده صحوته
ويّا الغيطان

قالوا على العرش إستويت
قالوا صدق
قالوا وبالخير ابتديت
قالوا بدأ
قالوا وقالوا وياما بالقولان ندايا كان ياريت
تتصوّروا؟
سجدوا أمامي طالبين المغفره
قالوا الغفور
يجثوا على ركابهم وجابوا المبخره
قالوا الشكور
باركتهم
وكرمتهم
وصدقت قولي لما بوعد قلبهم
ياحزنهم
كفروا بقلبي ف آخر الأزمان لنا
مش توّجوني يوم إله؟
مش صليتولي وقلتوا آه؟
ليه أنطرد من جنتي؟
ليه كلمتي..إتحرّفت؟
تتصوّروا؟؟
راح تدخلوا جنه وانا
هارفض دخول
وإتفرّجوا من عندكم
عاللي أنا
قلته لكم
وإبقوا قولولي جنّتي
من غير وجودي وسطها
فَتَحت لكم؟
-------------------
مايكل عادل

مــظاهره فــي الــحـــاره

كل ولاد الحاره هاتهتف
كل ولاد الحاره رجال

يا وسواس يا خنّاس
حُط العسكر وسط الناس
وإزرع كل غيطانها لصوص
واحرس مالهم بالحرّاس

كل ولاد الحاره هاتهتف
كل ولاد الحاره رجال

مدنة بلدي تهبّ تقول
هو الأكبر والمسئول
ترجع راسي تبص لعالي
يرقع دُفك والأرغول

كل ولاد الحاره هاتهتف
كل ولاد الحاره رجال

العوّاد راح يعزف لحنه
يفضل ينشد وسط الناس
راس الأفعى هايغلَب مُحنه
رغم العسكر والحرّاس
بنت العسكر راحت تسكر
دخلت بيتنا مالابسه لباس
عينها البجحه بتغمز ناجحه
وشدّه الحبل ف وسط الناس
شيلنا دموعنا وقيدنا شموعنا
..وقلنا بكل الحال والمال
كل ولاد الحاره هاتهتف
كل ولاد الحاره رجال
------------------------------

خــيـــّال

خيّال وياما ينكسر
من فوق رجول خيله
حنينه للسفر
عاشق لجام زيفه
وطيفه
ماانطوي من فوق زمام الكون في يوم
ساعة مغيب
لكنه ياما اعتاد وياما عاد
اسير طايب من رحلة الحريه
عايد عليل
يلزم سرير الكدب خايف م الفرح
لو يوم طرح
جوه القلوب
والع ياقلب الفارس الغلبان
طامع ف حرب
فيها الجنود شجعان
تايه ف درب
خارج عن الاوطان
عاشق..جعان
رافض..زمان
حرر قلوب الجبن
ناصر للي خان
والحر ياما ينقهر
من كتر سؤلانه عن الاحباب
ومن بعيد لبعيد
يلاقي كما فاته
الحال..ده هو الحال
راضي بغدر الدهر سارق للعطش
ياما بكل القهر ياما ينبطش
ياما عشق ياما
وياما بينكسر
رغم الكسور في العمر عمره
ما انأسر
لكن بأسره..حل كسره
فارقت الافراح عينيه
زاهد عن التسبيل
زاهد عن اللقمه
تارك جسده نحيل
رافض حروبك يازمن
ناكر كل الجميل
لكن ف يوم لعيون
مجافيه كل تسبيله وكل
سبّل عيونه كالعشاقي الولهانين
فارد غطاه
حالل رباط روحه
وهارب م الزمن
راجع يقود خيله
محارب للبعيد
فارق زمن زاحم
بناس
سايب زحامه
وحيد

اســألـيني

-
تسأليني عن الربيع؟
تسأليني عن الكلام؟
تسأليني عن رضيع؟
بيضحك وف عز الضلام
راح اعرّفك
وهاشهّدك
عن كل ما يحوي الورق
عن كل كلمه كتبتها
ف حب البلاد
لن تسمعي
لكن هاقولك
ارجعي
واسأليني
وانتي راح تلقي الجواب
-----
شفتي القمر؟؟
شفتيه وهو راضع من شعاع الشمس
ناطق بالفرح في الليل كلام؟
عشتيه ليالي؟
وف ليالي يغيب ياقمره عن عنيكي؟؟
اعرفي
ان القمر حزنان وشانق كل كلمه دفء
ياما قالها لينا
انما
عايز يعود للضحك تاني
في السما
رايد يضئ بالدفء تاني
كلما
نادي عليه قلب الصبايا
وارتمي
ف حضن الحبيب
شمّي الورود
دوقي الحليب
سيبي الوجود
روحي ل غريب
راح تلقي ويل الغيم ويلين
لو يرتمي
شط النما
عاشق لأنك
كلما
رديتي غيبته في الحياه
لالت سماه بالدفء رايح منتهاه
عاشق...سعيد
فاككك جناح الطير لديه
برّه الكتاف
حالل رباط
فوق البساط
شايل كلامك
احتياط
يمكن يحن ف يوم يعود
ارض المحبه
مبتداه
راضي بخبر يصبح يقين
يرمي النعوش
يحني الجبين
لاله حياه
ويحلّف القلب البعيد..
ابقي المحيني
وانا في يوم لن اعترض
لو
تسأليني
-------------------
اهداء الي البنت اللي مابقتش تسألني

دفــء أخيــر

وييجي البرد ويجمّد
في ريق عاشق
في ليله ويّا محبوبته
علي الأقمار
وغاب عن قلبي من يومها
دليل الليل
مايرشدني سوي نظرات
ومغموسه
في كحل ضباب
كأن الكون بيتزوّق
ويتسلّم
في عرس جديد
ولكن عرسه متحنّي
بحزن عميق
وقلب العاشق الخالي من الاحساس
في ليل شتوي
يئن ويعوي كالأجراس
في ليل تايه
أيدين في ايدين
علي أشواك
بترشد قلب
حسّاده...
نجوم الليل
وريشة طفل كان رايد
يصير رسام
بتتجمد مع الألوان
يرد البرق
كان نفسي أضئ في غياب
قمر ليلكم
لكني نتشت من ذعر العيال كلمة
انا خايف
يرد الرعد
انا ندهة اله حنّان
في ليل عاتم
باقول ماتخافش من غيبة
قمر ليلك
لكني سمعت
همسات البشر بتقول
يارب ألطف
وأحزان البشر بتقيد
نيران خيبه
بتطفي نيران و منزوله
لدفء فـ ليل
قلم شاعر بيكتب من سكون الليل
هدوء صخبه
يقول للناس...أنا معاود
لغربه كنت متونس انا فيها
لكنّي رجعت مالقيتكم
كما المطلوب
ولجل كمال أسف ليكم...
أنا غارب
وهارب من غصون بردي
لدفء أخير
في ليل نعشي

رؤيـه

سندت راسي علي تلّه
انام ولا...
افنجل عيني واتسامر؟؟
رأيت قله تكب مياها
في العلّه
تصير طايبه
مافيها جروح
رأيت انسان مازال انسان
رأيته كيان
مازال موجود
ومافي حدود..
مابين دوله و جارتها
مابين الوان بشر وجلود
لقيت الدود..
ترك جثه لأبن بار
وراح ينهش جسد جبار
لقيت الفقر مش علّه
لقيته يناغش الأفكار
يسرسبها
يكسّبها بلقمه حلال
ويايسيبها
يا اما الذمه تتراضي
وتتهادي...
وافوق واصحي
علي بطحه
في راسي من وقوع صخره
تصحّيني
تناديني
تقوللي فوق ياواد انتا
من احلامك
دي اوهامك..
ماليها اساس من الصحه
تريد جنه علي ارض
البشر عاتماها بالعصيان؟؟
تريد ورده علي ارض البوار طالها؟
وافنجل عيني واتسامر
ومن يومها
مافي احلام
تراودني

فنــان بطبعه

باطلع سلالم حيرتي
بالرجل الشمال
وانفض تراب روحي
بروحي
والعقل مال
ع القلب قالّه
ماالليل صديق
وماحد عاقل قايض الفكره بكلام
التوهه جوّه ف قلب شاعر
مش بمعني التوهه زايفه
ده الحبيب لو يوم يتوه
يلقي آخر الدرب نجمه
ترشده لشط الحبيب
الغنوه...كاس
مدهون بضي رمال صحاري مكثّبه
مرهون وياما الخمر جوّه ف قعر منّه
يندلق
والناس بتلحس في التراب
لجل ان تداوي الروح
بكسرة نفس مخموره بوهم
الذل..عم
والنخبه طالت من رقاب الناس
معاني العزّه مهضومه بمر
المعني...شر
والوهم...مهر
والحبيبه اللي تريد الوهم مهر
لو تطول تشرب دماك
وتمص فيها بطول ليالي
ماتكتفي
الحب عزه ماتنقض المعني بلوالي
حتي لو ضي النهار راح ينتفي
من فوق جبين الكون
في آخر فصل شتوي
يعدّي ع الانسان ويمضي
دي الحقيقه..
درب مرسوم البدايه
والنهايه..لسه ما اكتملت رسومها
اصل صاحب رسمة الخاتمه البعيده
هو ذاته
تايه الأوصال في درب اللوحه
من ساسه لراسه
حاير في رسمه
رغم انه
فنان بطبعه